Qiymətli metalların ekspertizası və damğalanması, eləcə də qiymətli daşların diaqnostikası və sertifikatlaşdırılması sahəsində Türkiyə təcrübəsini öyrənmək məqsədilə həyata keçirilmiş səfər zamanı Türkiyənin Xəzinə və Maliyyə Nazirliyinin Zərbxana və Damğa Mətbəəsi Baş İdarəsinin rəhbər heyəti ilə qurumlararası əməkdaşlıq məsələsi müzakirə olunub.

Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin tabeliyində olan “İstehlak Mallarının Ekspertizası Mərkəzi” MMC-nin (İMEM) nümayəndə heyəti Türkiyənin İstanbul şəhərinə işgüzar səfər edib. Türkiyənin Xəzinə və Maliyyə Nazirliyinin Zərbxana və Damğa Mətbəəsi Baş İdarəsinin dəvəti ilə həyata keçirilmiş səfər qiymətli metalların ekspertizası və damğalanması, eləcə də qiymətli daşların diaqnostikası və sertifikatlaşdırılması sahəsində Türkiyə təcrübəsini öyrənmək, bu istiqamətdə həyata keçirilən islahatlar və idarəetmə mexanizmləri ilə tanış olmaq məqsədi daşıyıb.

Görüş zamanı Türkiyənin Xəzinə və Maliyyə Nazirliyinin Zərbxana və Damğa Mətbəəsi Baş İdarəsinin rəhbər heyəti ilə qurumlararası əməkdaşlığın genişləndirilməsi və gələcək əməkdaşlıq perspektivləri barədə fikir mübadiləsi aparılıb.

Tədbir çərçivəsində İMEM-in nümayəndə heyəti qurumun İstanbulda yerləşən baş ofisində, həmçinin qiymətli metallar və qiymətli daşlar üzrə analiz laboratoriyalarında olub. Burada külçə və sikkələrin, eləcə də dövriyyədə olan metal pulların istehsalı prosesi, laborator analizlərin təşkili, texnoloji infrastruktur və fəaliyyət prinsipləri ilə yerində tanışlıq həyata keçirilib.