Sahibkarlara qiymətli metallar və qiymətli daşlardan hazırlanmış məmulatların dövriyyəsini tənzimləyən normativ hüquqi aktlarda yer alan meyarlar və əyarlama xidməti barədə ətraflı məlumat verilib.
Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi qiymətli metallar və qiymətli daşlardan hazırlanmış zərgərlik məmulatlarının dövriyyəsində qanunvericiliyin tələblərinə riayət olunmasının təşviqi istiqamətində maarifləndirici tədbirlərini davam etdirir. Bu çərçivədə növbəti görüş “Xalqlar Dostluğu” ticarət mərkəzində zərgərlik məmulatlarının satışı sahəsində fəaliyyət göstərən sahibkarlarla keçirilib.
Görüş zamanı zərgərlik məmulatlarının əyarlanması qaydaları və müvafiq sahədə dövlət rüsumlarının tətbiqi barədə məlumat verilib. Bundan əlavə əyar damğası vurulmamış qiymətli metal məmulatlarının dövriyyəsinə görə qanunvericilikdə nəzərdə tutulan məsuliyyət tədbirləri, habelə sahibkarların hüquq və vəzifələri diqqətə çatdırılıb. Bildirilib ki, görülən tədbirlər istehlakçıların düzgün məlumatlandırılması, maraqlarının etibarlı qorunması, eləcə də bazarda sağlam rəqabət mühitinin möhkəmləndirilməsinə xidmət edir.
Sonda təcrübədə rast gəlinən nümunələr üzərindən izahlar verilib, iştirakçıların sualları cavablandırılıb.
