Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin nümayəndəsi Naxçıvan Dövlət Universitetində dövlət satınalmalarına həsr olunmuş təlimdə iştirak edib.
Naxçıvan Muxtar Respublikası üzrə fəaliyyət göstərən 40-dan çox dövlət və özəl təşkilatın nümayəndəsi, o cümlədən universitet əməkdaşlarının iştirakı ilə keçirilən təlimdə Agentliyin sektor müdiri Nicat Xəlilov “Dövlət satınalmalarında müşahidə olunan əsas çağırışlar və Agentliyin tövsiyələri” mövzusunda təqdimatla çıxış edib.
Təqdimat zamanı dövlət satınalmalarının əsas prinsipləri iştirakçıların diqqətinə çatdırılıb, satınalma prosedurlarının həyata keçirilməsi zamanı ortaya çıxan aktual məsələlər barədə məlumat verilib. Eyni zamanda ehtimal olunan qiymətin düzgün formalaşdırılması, şərtlər toplusunun qanunvericiliyin tələblərinə uyğun hazırlanması, təchizatçıların təkliflərinin qiymətləndirilməsi, onların satınalmadan kənarlaşdırılması halları, şikayətlərin verilməsi və satınalma müqaviləsinin tərtibi qaydaları izah edilib, Dövlət satınalmalarının vahid internet portalı (Etender.gov.az) vasitəsilə dövlət satınalmalarında düzgün iştirak qaydaları diqqətə çatdırılıb.
Tədbir çərçivəsində həmçinin Azərbaycan Respublikası Hesablama Palatasının əməkdaşı Nizami Alməmmədovun təqdimatında “Dövlət satınalmalarının auditi” mövzusunda çıxış dinlənilib, müvafiq sahədə tətbiq olunan nəzarət mexanizmləri barədə məlumat verilib.
Təlimin sonunda iştirakçıları maraqlandıran suallar praktiki nümunələr üzərindən cavablandırılıb, satınalma proseslərində uğurlu iştirak üçün zəruri tövsiyələr verilib.
