Ölkədə informasiya texnologiyalarının inkişafına, rəqəmsal xidmətlərin genişləndirilməsinə və innovativ onlayn resursların təşviqinə töhfə verən layihələr sırasında “E-tender.gov.az” və “Istehlakchi.gov.az” platformaları da mükafatlandırılıb.

Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi tərəfindən yaradılan və idarə olunan rəqəmsal informasiya sistemləri Milli İnternet Mükafatı - MilliNet2025 çərçivəsində müxtəlif nominasiyalar üzrə mükafatlara layiq görülüb.

Dövlət satınalmalarının vahid internet portalı - “Etender.gov.az” müsabiqədə “İlin rəqəmsal hökumət həlli” nominasiyası üzrə qalib seçilib. “İlin rəqəmsal sosial resursu” nominasiyasında isə “Istehlakchi.gov.az” platforması ikinci yerə layiq görülüb.

Qeyd edək ki, MilliNet 2025-də 13 nominasiya üzrə ümumilikdə 179 rəqəmsal resurs müsabiqəyə təqdim olunub.

Qeyd: Azərbaycan İnternet Forumu tərəfindən təsis edilən MilliNet müsabiqəsi hər il ölkənin ən yaxşı rəqəmsal resurslarının tanıdılması, müvafiq sektorda rəqabətli mühitin formalaşdırılması və rəqəmsal transformasiyanın daha da sürətlənməsinə dəstəyin göstərilməsi məqsədilə keçirilir.