Kiçik istehlakçılara öz hüquqları praktiki nümunələr əsasında izah olunub, bu hüquqların qorunması ilə bağlı müvafiq tövsiyələr verilib.
Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin təşkilatçılığı və Azərbaycan Respublikasının Elm və Təhsil Nazirliyinin dəstəyi ilə 15 Mart – Ümumdünya İstehlakçı Hüquqlarının Müdafiəsi Günü ərəfəsində Bakı şəhərinin ümumtəhsil məktəblərində açıq dərslər keçirilib. Bu çərçivədə növbəti görüşlər Xətai rayonu 55 nömrəli, Nizami rayonu 214 nömrəli və Binəqədi rayonu 205 nömrəli tam orta ümumtəhsil məktəblərinin şagirdləri üçün təşkil olunub.
Məktəbyaşlı uşaqlara istehlakçı hüquqları ilə bağlı ilkin biliklərin aşılanması məqsədilə keçirilən açıq dərslər zamanı Agentliyin əməkdaşları tərəfindən təqdimatlar edilib. Şagirdlərə malın dəyişdirilməsi və qaytarılması zamanı riayət olunmalı qaydalar, eləcə də geri qaytarılması mümkün olmayan mallar barədə ətraflı məlumat verilib.
Həmçinin kiçik istehlakçılara mağazada alış-veriş edərkən və ya hər hansı xidmətdən istifadə zamanı məlumat almaq, sərbəst seçim etmək kimi əsas istehlakçı hüquqlarından necə istifadə etmə olduqları praktiki nümunələr əsasında izah edilib, eləcə də bu hüquqların qorunması ilə bağlı müvafiq tövsiyələr verilib.
Görüşlər zamanı məktəblilərin mövzu ilə bağlı ünvanladıqları suallar cavablandırılıb, onları maraqlandıran məqamlara aydınlıq gətirilib.
