Tədbir çərçivəsində əmtəə nişanından qanunsuz istifadə edilməsi ilə bağlı Rəqabət Məcəlləsində təsbit olunmuş tənzimləmə mexanizmləri barədə məlumat verilib.

Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi və “Caspian Energy Club”ın birgə təşkilatçılığı ilə “Əmtəə nişanından qanunsuz istifadə nəticəsində baş verən haqsız rəqabət hallarının qarşısının alınması” mövzusunda onlayn maarifləndirici seminar keçirilib. Seminarda pərakəndə ticarət, istehsal, ixrac, logistika, nəqliyyat, xidmət və digər sahələrdə fəaliyyət göstərən 40-dan çox biznes subyektinin təmsilçisi iştirak edib.

Tədbirdə Agentliyin sədrinin birinci müavini Cəfər Babayev və Haqsız rəqabət və reklam qanunvericiliyinə nəzarət şöbəsinin sektor müdiri Röyal Rəhimov çıxış ediblər. Çıxışlar zamanı əmtəə nişanlarının qorunması sahəsində mövcud vəziyyət, hüquqi tənzimləmə mexanizmləri, eləcə də Rəqabət Məcəlləsində əmtəə nişanlarından qanunsuz istifadə və digər haqsız rəqabət halları ilə bağlı nəzərdə tutulan müddəalar barədə məlumat verilib.

Bununla yanaşı, rəqibə məxsus əmtəə nişanından qanunsuz istifadənin haqsız rəqabətə səbəb olduğu hallar, bununla əlaqədar sahibkarların hüquq və vəzifələri, habelə qanunvericiliyin tələblərinin pozulmasına görə tətbiq edilən maliyyə sanksiyaları ilə bağlı məsələlər iştirakçıların diqqətinə çatdırılıb.

Seminar çərçivəsində iştirakçılara mövzu ilə bağlı əyani nümunələr üzərindən izahlar verilib, onların sualları cavablandırılıb.